ದಿಟದ ಭ್ರಮೆಯ ಕನಸು ಕಂಡೆ

ದಿಟದ ಭ್ರಮೆಯ ಕನಸು ಕಂಡೆ

ಕೆ ಆರ್ ಎಸ್ ಮೂರ್ತಿ

ಕತ್ತಲೆಯಲಿ ನನ್ನ ಪ್ರತಿಬಿಂಬವ ಕಂಡೆ
ಕಿವುಡ ತಲೆದೂಡಿ ಸಂಗೀತವ ಕೇಳಿದಂತೆ

ನಿನ್ನೆಯನು ಕಾತರದಿ ಎದುರು ಕಾಣುವವನಂತೆ
ನಾಳಿನ ಸವಿನೆನಪು ಇಂದೆ ಆಗಿಹೋದಂತೆ

ಕನಸಿನಲಿ ಕಂಡ ಠೊಳ್ಳನೇ ನಿಜವೆಂಬಂತೆ
ನನ್ನ ಶವದ ಮೇಲ್ಬಿದ್ದು ನಾನೆ ಅತ್ತಂತೆ

ಭೂಮಿಯೆಡೆ ಬೀಳುವ ಕಲ್ಲು ಠಟ್ಟನೆ ದಿಗಂತಕ್ಕೇರಿದಂತೆ
ಮಳೆಹನಿಗಳು ನೆಲದಿಂದ ಆಗಸಕ್ಕೇರಿದಂತೆ

ನನ್ನ ಅಪ್ಪಿಗೆಯಲಿ ನನ್ನನು ನಾನೆ ಸುಖ ಪಟ್ಟಂತೆ
ನನ್ನ ಪ್ರಿಯೆಯನ್ನು ತೊರೆವ ಆತರ ಆವರಿಸಿಕೊಂಡಂತೆ

ನನ್ನ ಗರ್ಭದಿಂದ ನಾನೇ ಹುಟ್ಟಿಬಂದಂತೆ
ನನ್ನ ಸಾವಿಗೆ ನಾನೇ ಕುಣಿದಾಡಿದಂತೆ

ಹಸಿದ ಹೊಟ್ಟೆಯವನು ಧಿಡೀರ್ ತೇಗಿಬಿಟ್ಟಂತೆ
ಶೂನ್ಯದಲಿ ಸರ್ವ ಸಂಪತ್ತಿನ ತೃಪ್ತನಾದಂತೆ

ವಿಶ್ವದಲಿ ಎಲ್ಲೆಲ್ಲಿ ಹುಡುಕಿದರೂ ನಾನೊಬ್ಬನೇ ಇರುವನಂತೆ
ಏಕಾಂತದಲಿ ಎನ್ನಾತ್ಮವನು ಪರಮಾತ್ಮ ಭ್ರಮಿಸಿದನಂತೆ

ಎರಡು ಕನ್ನಡಿ ಮಧ್ಯೆ ನಾನಿಂತು, ನನ್ನ ಕಣ್ಣಿಂದೇ
ಸಾವಿರ ಸಾವಿರ ಸಾವಿರ ಬಿಂಬಗಳ ನೋಡಿ ದುರುಕಿಸಿದಂತೆ

ನಂಬಲಾರದನು ನಾ ಕಂಡೆ, ನನ್ನನ್ನೇ ನನ್ನ ಬಿಂಬವು ನೋಡಿದಂತೆ
ಸತ್ಯ ಮಿಥ್ಯೆಗಳು, ಸಕಲ ಸೃಷ್ಟಿಯು ಬಿಂದುವಿನಲಿ ವಿಲೀನವಾದಂತೆ

ಇದ್ಯಾತರ ಲೆಕ್ಕವೋ, ಸರಿ ಬೆಸಗಳು ಬೆರೆಸಿಹೋದಂತೆ
ಕತ್ತಲೆ ಬೆಳಕುಗಳು, ಸಿಹಿ, ಕಹಿಗಳು ಬೇರೆಯಲ್ಲವಂತೆ

ಕಾಲ ಮಾಯೆ, ದಿಕ್ಕೆಲ್ಲ ಮಾಯೆ, ಭ್ರಮಿಸುವವ ನಾನೆ ಮಾಯೆ
ಭ್ರಮಿಸುವುದೇ ಮಾಯೆ, ಭ್ರಮಣ ಕಾರಣ, ಕರ್ತ, ಕ್ರಿಯೆಯೂ ಮಾಯೆ

ಅದೇನಿತ್ತೋ, ಇಲ್ಲವೋ; ಅದೇನಿದೆಯೋ, ಇಲ್ಲವೋ; ಅದೆನಹುದೋ, ಇಲ್ಲವೋ
ಎಲ್ಲವೂ ಇಲ್ಲ; ಇಲ್ಲ-ಇಹುದು-ಇದ್ದೀತೂ ಎಲ್ಲವೂ ಒಂದರಲ್ಲೊಂದು ವಿಲೀನ